صناعة الغباء

صناعة الغباء 

الغباء له اهله وناسه وهو عدوى والشفاء منه حاجه صعبه جدا 

القصه الافتراضيه دى كان بيتم الاستعانه بها فى محاضرات التنميه الاداريه 

بتقول ايه بقى......

انه كان فيه 10 اطفال بيلعبوا جنب شريط القطر

اختار 9 منهم ان يلعبوا جنب الخط اللى القطر بيعدى عليه بانتظام 

والطفل العاشر اختار انه يلعب جنب الخط المهجور اللى مفيش قطر بيعدى عليه 

وفجأه .....لمح عامل المزلقان القطر .....وفاترعب على الاطفال التسعه اللى بيلعبوا على شريط القطر .....ياترى احنا لو مكانه هنتصرف ازاى !!!!؟

مش مشكله دلوقتى 

المهم الرجل فى القصه الافتراضيه اتصرف ازاى 

فكر بسرعه وقرر انه يحول القطر من الخط الاصلى للخط المهجور .....وكده ضحى بطفل فى سبيل انقاذ تسعه اطفال ........حلو الكلام !!!!؟

لاول وهله ....يبدولنا ان عامل المزلقان اتصرف صح ...بمنطق الكم لانه انقذ تسعه 

يعنى قراره انقذ الموقف باقل الخسائر 

لكن لو فكرنا بعمق ومنطق لاكتشفنا انه مخطىء تماما 

لييييييه ؟

لان الطفل الواحد اللى ضحى به عامل المزلقان كان اذكى الاطفال العشره 

لانه هو الوحيد اللى فكر صح واختار انه يلعب فى المكان الامن 

اما التسعه الاخرون اللى تم انقاذ حياتهم هما الاغبياء المستهترون لانهم مافكروش واختاروا اللعب فى مكان خطر ......
.طبعا معالجه الموضوع بهذه النظره يبدو قاسى جدا وغير عاطفى .....بس هو ده الفرق بين المجتمعات الذكيه والغبيه
 فى المجتمعات الغبيه دايما يتم التضحيه بالاذكياء وذوى الكفاءه ...


.اما المجتمعات الذكيه فداائما الاذكياءوالعقلاء هم اللى بيقودوا والدول التى تبحث عن التقدم دايما تبحث عن المميزين والاذكياء..


وتضعهم فى اول الصف لان عقولهم وذكائهم قادرين على دفع مجتمعاتهم بما فيها الاغبياء الى الامام 

اما الدول بعد الشر عنا وعنكم الغبيه ,فتحترف قتل المواهب ودفن الافكار والعقول

وتضع الاغبياء فى اول الصف ...فيجذبون الكل الى الهاويه ....وفى الغالب بيجدوا ناس اغبى منهم تصقف لهم 

فى الدول المتقدمه يتم احتواء العقول والانفاق عليها ....لان من الممكن جدا ان عقليه واحده تتمتع بالذكاء ورجاحه العقل تقدر تحل مشكله مزمنه كانت تستعصى على الحل.....وطبعا دى مهمه صعبه جدا

اما بقى الدول اللى متتسماش .....الغبيه 

الاغبيا اكتر من الهم على القلب منتشرون مثل الوباء

وطبعا لايمكن لبنى ادم غبى انه يستعين باخر اذكى من حضرته لمساعدته ....طبعا بيختار حداغبى منه


 فى احيان كتيره جدا بيخلفه وعلشان كده بنجد ان الدول الذكيه المتقدمه بتزداد تقدما والتانيين بيزدادوا غبااااااااااوه 


فى الدول الذكيه يتم استثمار العقول لانها بتدعم الاستقرار ...بكل انواعه اجتماعى واقتصادى و......سياسى 


ودائما تفكر الدول الذكيه فى تطوير ماتمتلكه من عقول ودعم مهارات ومواهب المميزين


اما من يعتنقوا الغباءفدائما وابدا يسبحون فى بحور عميقه من الغش والكذب والتضليل 


وعلشان كده 
بنجد مسئولين فى الدول الذكيه بيعرفوا امتى يتركوا المسؤليه ....لييييه ؟


لانهم اذكياء ومدركين لطبيعه الزمن وحركته وحق الاجيال الذكيه التى تليهم ....


.ولانهم اذكىاء فانهم واثقون تماما ان فيه واحد من الاجيال دى اقدر واكفأ وافضل منهم ..




..ووقتها ممكن جدا يبقوا سعداء لانهم نجحوا فى اخراج اجيال قادره على تحقيق مالم يقدر وا هم على تحقيقه ......اه والله 
!!!!!!!!!!

نظيره بقى فى الدول اللى ماتتسماش ....بيقاتل من اجل الاستمرار فى منصبه ويمسك فيه بايديه وسنانه 


لييه ؟
لانه يشعر ان قيمته فى كرسيه مش فى شخصه ولا عقله 


ودائما يحارب من يحاول ان يصل لنفس مكانته ..
....لانه عاده ....بيكون وصل لها بطرق غير طبيعيه ....


ودائما يظن انه اذكى الاذكياء وانه عنده القدره على خداع الاخرين ...


..وطبعا اللى بيجى بعد بيبقى اغبى واسوء منه


وحال المرؤسين لايختلف عن حال رؤسائهم


ففى الدول الذكيه نجده طموح وواثق من نفسه ومن قدراته ودائما يعمل على تحسين قدراته ....لان ده مرتبط بزياده فرصه فى الترقى .....
.صاحبنا بتاع الدول الغبيه لايبذل اى مجهود .....دايما ريلاااااكس ومستكين لانه عارف ان وجوده فى مكانه وارتقائه فيه مرهون بطاعته لاوامر رئيسه ...
.فلا يطمح فى شىء الا فى البقاء فى مكانه .....او يطلع علينا بافكار لوذعيه من عينه التوقيت الشتوى فى عز الصيف

اعذروونى طولت عليكم اوى 

بس دى كانت تداعيات افكار جت على بالى بعد الخبر المضحك اللى قريته النهارده بخصوص عوده التوقيت الشتوى فى عز اغسطس ويرجع تانى صيفى بعد رمضان ولمده عشرين يوم ويرجع شتوى تااااااانى 

آآآآآآآآآآآه يادماااااغى..........................وكل سنه وانتم طيبين 






منقوووووووووول ....بتصرف

14 التعليقات

مرسلة بواسطة دودو في الاثنين, يوليو 19, 2010

حداد على خالد سعيد

بِسم الله الرحمن الرحيم

وَكَتَبْنَا عَلَيْهِمْ فِيهَا أَنَّ النَّفْسَ بِالنَّفْسِ وَالْعَيْنَ بِالْعَيْنِ وَالأَنفَ بِالأَنفِ وَالأُذُنَ بِالأُذُنِ وَالسِّنَّ بِالسِّنِّ وَالْجُرُوحَ قِصَاصٌ فَمَن تَصَدَّقَ بِهِ فَهُوَ كَفَّارَةٌ لَّهُ وَمَن لَّمْ يَحْكُم بِمَا أنزَلَ اللّهُ فَأُوْلَـئِكَ هُمُ الظَّالِمُونَ


صدق الله العظيم

1 التعليقات

مرسلة بواسطة دودو في الجمعة, يونيو 25, 2010

لا مختصر ولا مفيد .

...استفزنى مقال الصحفى الجبار محمد على ابراهيم 

اللى ابدى دهشه كبيره من دفاع المصريين عن خالد سعيد ووصفه بشهيد البانجو 


وياريته اكتفى بكده لا....


ده على حد قوله فى مقطع من مقالاته الجباره 


ااذاكانت الداخليه رافت بالقتيل ولم تشأ ان تظهر سجله المخزى حرصا على حرمه الاموات !!!!!!
الا ان الصف الخاصه والمعارضه اجبرت الداخليه على نشر مايسىء للقتيل رغم امتناعها فى البدايه واكرر ان الكراهيه والرغبه فى الانتقام من الدوله والنظام والامن تدفع البعض الى ارتكاب اخطاء قاتله فى سبيل التشويه واشاعه الفوضى
طيب هنخلينا مع حضرته لحد باب الدار


وزى مابيقولولنا ادايما اننا فى بلد حريات


وان الاختلاف فى الراى لايفسد للود قضيه 
نناقش حضرته فى كلامه


فرضا ان خالد متعاطى مخدرات ومات مخنوق وهو بيحاول اخفائها 
!!!!!!!!!!!
طيب الاثار الفظيعه اللى على جسمه ووشه دى جت منيين ؟




لو هو تاجر مخدرات ....مش المفروض ان فيه طرق قانونيه لمحاكمه الخارجين على القانون من غير المساس بادميتهم ؟


ايوه ادميتهم ....


لو هو ادى خدمته العسكريه بتقدير ردىء..........ايه المشكله ؟


مااحنا سمعنا عن المطرب اللى اتهرب من الخدمه العسكريه خالص


وزور وبالرغم من كده بيجيبوه يغنى فى احتفالات القوات المسلحه بنصر اكتوبر 
!!!!!!!!!!!!!!!!!!!


يعنى حتى هو لو مجرم ويستحق العقاب المفروض مين يعاقبه وازاى ؟


اكيد ده شغل القضاء والمحاكم 


ولا العقاب دلوقتى بقى فورى ويتم فى الشوارع !!؟


ياريت سياده رئيس تحرير الجمهوريه الهمام يتخيل نفسه هو او حد من اقاربه فى نفس الموقف  وساعتها نشوف ......هل هيبقى ده هو نفس رد فعله ؟


اما عن ماقاله عن  ان الكراهيه الشديده لاجهزه الدوله هى المحرك للمظاهرات وغيرها من مظاهر الاعتراض على مقتل خالد 


ياريت حضرته يفكر شويه ويقولنا تفسيره للكراهيه دى 




هل من المعقول ان اتفاق اكتر من شخص على كره كيان ما او شخص من غير سبب؟


ياريت جنابه يشغل عقله شويه 
يمكن يفهم

13 التعليقات

مرسلة بواسطة دودو في الأربعاء, يونيو 16, 2010

موعود ياللى عليك الدور

هل سألنا نفسنا ولو للحظة مَنْ هو الشهيد الجاى؟ ومَنْ هيكون الضحية الجاية؟

لان اكيد هيكون فيه ضحية قادمة...

لكن ياترى سألنا نفسنا مَينْ هو؟

ممكن تتخيل ولو للحظة أن الضحية اللى عليها الدور ممكن يكون أقرب الأقربين إليك؟

ممكن يكون .. .. أبوك .. ابنك .. جارك .. زميلك ..صاحبك.. أو أنت نفسك
ايوه...
ممكن تكون أنت نفسك الضحية الجايه


ولان مفيش حاجه تضمن ان محدش فينا يحصل له زى اللى حصل لخالد


 أو تخلينا نحس ان احنا بعيد وفى في مأمن منه مهما كانت الاحتياطات ومهما كنا حذرين.

سلبيتنا وسكوتنا ومبدأنا المفضل اللى مخلينا نمشى تحت الحيط مش جنبه مش هيحمينا


من أننا  ممكن يكون حدفينا هو الضحية القادمة.


ياترى هنفضل نطالب بحق خالد وهنفضل بنفس الحماس 


ولا كالعاده هنتحمس ونثور شويه وبعد كده كأن شيئا لم يكن


ونبتدى نتحمس لقضيه جديده وننساها بعد شويه .....وهكذا


اتمنى ان اللى حصل لخالد يبقى بدايه لحاجه تتغير 

علشان ابنى 
وابنك وكل ولادنا اللى ممكن يحصل لهم زى ماحصل لخالد





ياترى هنسكت وننسى زى تعودنا دائمًا؟

9 التعليقات

مرسلة بواسطة دودو في الثلاثاء, يونيو 15, 2010

زومبى

لمروره بضائقة مالية..

انتحار شاب من فوق عمارة سكنية بالشيخ زايد

مصري ينتحر "شنقاً" على أشهر كباري القاهرة لعجزه عن الزواج

	صعيدى يقطع "عضوه الذكرى" فى الشارع لتأخر زواجه

دى عناوين الجرايد اليومين دول 

حاجه غريبه جدا ....ايه اللى بيحصل !!!!!!!؟

الناس ليه بقت عندها يأس شديد للدرجه دى !!!؟

ليه الدنيا بقت سوده قوى فى عنيهم للدرجه دى !!؟

يمكن علشان حاسين انه مفيش فايده ؟

طيب ليه شاب عنده 31 سنه ومش عارف يعمل حاجه فى حياته !؟

وليه واحد عنده 30 سنه ومش قادر يلاقى شغل !!؟

وليه واحد تانى عنده 40 سنه ومش عارف يتجوز!!!!؟

بلد غريبه جدا 

ايوه غريبه 

لان فيها ناس كده ........مع ان فيها ناس تانيه بتقدر تدفع مهر 25 مليون جنيه .....علشان يتجوزوا فاتنه البرلمان ويقعدوها فى البيت .......طبعا غير الشبكه وخلافه 

وناس تانيه ..........بتدفع مبلغ تضاربت حوله الروايات مابين 20 الى 100مليون دولار  لاهل اشهر قتيله فيكى يامنطقه !!!!!!!!!!!!

ده غير الارقام الفلكيه اللى بنسمعها 

كابتن شوشو الجاهل سىء الخلق ثقيل الظل  بياخد 12 مليون

الفنانين اللى بيتحفونا بالتحف الخالده كل موسم كل واحد فيهم بياخد 10 مليون فى الفيلم

وغيره وغيره 

مش باقولكم بلد عجيبه 

 

ياترى الحاجات دى وغيرها هى اللى خلت شباب زى دول يكفروا بكل شىء

حياه صعبه وظروف اصعب .........وللاسف مفيش حد فينا بقى يحس بالتانى 

يعنى وانا باقرا خبر الشاب اللى انتحر من على كوبرى قصر النيل 

وشفت شكل الحبل وازاى مربوط 

يعنى اكيد اخد وقت 

مالفتش نظر اى حد من اللى ماشيين!!!!؟

ايه اللى جرالنا !!!!!؟

طيب الكارثه الكبيره من تداعى كل شىء حوالينا ..........وانتشار البطاله والفقر وغيره 

وعارفين ايه السبب فيها

طيب احنا !!!!!!!!!

ايه اللى جرى لنا !!!!!؟

ليه بقينا مجموعات من الموتى الاحياء ..........ماشيين مش حاسين باى حاجه بتحصل ..........ولا شايفين بعض..........ولا حاسين ببعض ؟

10 التعليقات

مرسلة بواسطة دودو في الخميس, يونيو 03, 2010

اطلب عنيا

حاجات كتير حصلت اليومين دول قضايا مصيريه 

زى ماتش الاهلى والزمالك او حكايه شوبير واتحاد الكوره 

ويمكن قض اعتصامات العمال بالقوه 

حاجات كتير خليتنا مانخدش بالنا من موضوع مهم جدا عدى على الكل ومالفتش نظرنا 

اوى برغم خطورته وخطوره  دلالاته 

الحكايه ومافيها 

ان زوجه شابه جالها اكتئاب وانتحرت ........عااااااااادى بتحصل 

الزوج راح علشان ينهى اجراءات استلام الجثمان 

فوجىء ان زوجته منزوعه القرنيات 

بمعنى اخر منزوعه العيون 

ادونى عقلكم ,,

لو اى حد لاقدر الله شاف منظر زى ده او قابله موقف زى الموقف ده !!!؟

وبعد البحث والتحرى والدوخه وانكار اداره المستشفى ظهرت الحقيقه 

الحقيقه ياجماعه ان ده قرار من سعاده جناب وزير صحتنا !!!!

لا وايه قرار سرى !!!!!!!!

القرار بيقول 

يتم نزع قرنيات الموتوفين وفاه طبيعيه او المتوفيين فى حوادث دون  الحاجه لموافقه اهاليهم

!!!!!!!!!

ياحلااااااااااوه

للدرجه دى مبقاش لنا قيمه ؟

للدرجه دى مبقاش لنا كرامه واحنا عايشين ولا لاجسادنا حرمه واحنا ميتين؟

ازاااااااااااى

طيب جربوا تحترمونا وتسالونا ولو مره واحده 

مش يمكن لو سالتونا نوافق 

بجد الموضوع فى منتهى الخطوره.......والاخطر انه مالفتش انتباه حد وعدى كانه حاجه عاديه 

ياخوفى بعد كده مايستنوش علينا لحد مانموت علشان ياخدوا اعضائنا.....

8 التعليقات

مرسلة بواسطة دودو في السبت, مايو 29, 2010

الصبر

الصبر صفة رئيسية عند المصريين فهم من اكثر الشعوب صبراً على ما يقع لهم 

،  ويمكن الصفة دى نتيجه الانتظار الطويل،

 فالغالبية كانوا يعملوا فى مهنة الفلاحة ، تحرث الارض وترمي البذور وليس هناك مشكلة مياه مثل باقي الشعوب وبعد الانتهاء من هذه الاعمال الأولية ليس هناك سوى انتظار المحصول  ( طبعا ده كان زمان قبل الخيبه بتاعه اتفاقيات المياه)

  تكرار مستمر منظم لوقت الجهد ووقت الانتظار حتى موعد الحصاد

تكرار ترسّخ في جينات المصريين عبرالاف  السنين 

ومن اهم صفاتنا كمصريين الصبر على المصائب

 فالنيل العظيم كان يفيض كل عام ومعه الخير والدمار في  وقت واحد ، فمع حصولنا على الخير لابد من الصبر وتحمل الشدائد

الفيضان بخيره وشره معاً هو اللى اعطى المصريين النظرة الفلسفية للحياة والحكمة وحب الفكاهة والسخرية من واقعهم الاليم

ولن ننسى  دور الجغرافيا في بناء الشخصية المصرية

فالتضاريس السهلة يصعب الدفاع عنهامما جعلنا فريسة سهلة

فبعد مقاومة بسيطة تسقط مصر  فى يد الاعداء 

 ولكن مصر لا تنكسر  تتقوقع على نفسها ويبقى المستعمر  دخيلاً غريباً   يتأثر بمصر ويأخذ منها بعضاً من حضارتها يستفيد منها ، ولكنه يمر كغيره 

مصرهي السهل الممتنع ولم تتأثر من خارجها الا برسالات السماء

فمصر تتغير بالعقل والمنطق ولا تتغير بقوة السلاح .

عبر التاريخ  كانت معارك مصر الحاسمة مع الاخرين كلها انتصارات فالجندي المصري صبور وقادر على المنازلة والقتال لو توفرت له القيادة المناسبة .

    

  وحاكم مصرعلى مر العصور هو رب العائلة الكبيرة .  

افراد العائلة ينظرون الى رب العائلة باحترام وتقدير وتعظيم ، فهو الأب الحنون الحكيم الذي يوكلون له  امورهم وهو أدرى بمصلحتهم حتى لو كان قاسياً بعض الاحيان.

و نادرا ماتم تغيير  رب العائله بالقوة عبر التاريخ الطويل لمصر

دائما دائما تنتظر العائلة النهاية الطبيعية لربها مهما كان فاسدا  او قاسياً ويرجع هذا الى صفة الصبر الموجودة في الجينات المتوارثة 

1 التعليقات

مرسلة بواسطة دودو في الأربعاء, مايو 19, 2010

قول للزمان ارجع يازمان

عنوان البوست ده مقتبس من قول مأثور للسيد وزير التعليم 


ردا على مواطن معتصم امام مجلس الشعب لانه بيطالب باسثناء لابنته مثل اصحاب الوسايط


بصرف النظر عن ان الاب له حق او لا
او بيعتصم بسبب تاخر اولاده سنه دراسيه او بسبب شعوره بالظلم  والقهر


كلام سياده الوزير مع الراجل كان فيه  سخريه واستخفاف 


مع ان المشكله ابسط مايكون ولو كان فيه قدر من الحكمه فى التعامل مع الامور 


كانت مشاكل كتير اتحلت 


ولكن ان الوضع تحول لعند بين طرفين غير متكافئين 


الساده المسؤلين والكبرات والمواطنين الغلابه 


وطبعا النتيجه معروفه 
مزيد من الظلم والقهر 


مفيش كده فى الدنيا ...حكومه المفروض ان وظيفتها خدمه المواطنين وبدل ماتقوم بواجبتها ناحيتهم وتريحهم 


بتعاندهم  .....طيب واخرتها 


ويكمل الموضوع بان السيده الفاضله وزيره الاسره  تشك الراجل بلاغ لانه بيستغل اطفاله 


ده بدل ماتتعاون مع وزاره التعليم فى حل مشكله المواطن  ده وغيره 


وقال ايه قطع قلبها منظرهم وهما فى الشارع 


طيب حلوا مشاكلهم وارحموهم


واضافت سيادتها ان كل من له حق لابد ان يلجاأ للقانون وكلنا معاه علشان ياخد حقه 




صحيح شر البليه مايضحك
اى قانون ياست الحاجه 


هو لو فيه حد عارف ياخد حقه بالقانون  او بالمناقشه مع المسؤلين 


كنا شفنا كم الاعتصامات الموجوده دى


وبمناسبه الاعتصامات  لو كان الاب المعتصم ده بص بصه على المعتصمين جيرانه 


كان هيقابل مجموعه شباب زى الفل اسمهم مجموعه الخمسه والاربعين 


مجموعه من الاوائل على كليات الحقوق  تم تخطيهم  فى التعيين فى النيابه وتم تعيين مجموعه من الفاشلين اصحاب الوسايط فى اماكنهم




وواضح انهم كانوا مصدقيين حكايه كل واحد ياخد حقه بالقانون


ورفعوا قضايا للمطالبه بحقوقهم وبعد 11 سنه تم الحكم لصالحهم 


ياسلاااااام يحيا العدل 
ولكن لم يتم تنفيذالحكم برغم انه حكم  ملزم......وكان مصيرهم هو الجلوس على الرصيف المقابل 


ياسبحان الله 


لو الاب المعتصم  فكر ثواتى .....كان عرف ان اللى بيعمله ده مالوش اى لازمه لان فى الاول والاخر كله مصيره على الرصيف

10 التعليقات

مرسلة بواسطة دودو في الثلاثاء, مايو 18, 2010

الفن واهله

الفن سلاح ذو حدين إما أن يوظف للسموبالأخلاق والقيم، وإوانشر السوقيه وا لإنحلال
، وما لم يوجه الفن توجيه جيد استغل في نشر القيم الرديئه والذوق المتدنى 

مع الطوفان الفظيع من المطربين واغانيهم التافهه والساده الممثلون والممثلا

ت واعماله الاكتر من تافهه

وبالرغم من كده ....بيتم تكريمهم والاحتفاء بهم 

كانهم بيعملو انجازات محدش يقدر يعملها 

او ان اعمالهم الرديئه كانت سبب فى تقدم البلد 

!!!!!!!!!!!

والا نفسر بايه الاحترام والتكريم المادى والمعنوى اللى اعظم عالم فى البلد مايحلمش انه يحصل عليه

 

استفزنى جدا وانا باقلب فى القنوات الممثله اللى فاكرنفسها

هتعيد امجاد السيما 

فوجئت بيها بتقول للمذيعه بطريقه سوقيه مع غمزه عين 

تقدرى تدخلى على النت وتشوفى الناس بتقول على مين فينا اكتر انوثه 

!!!!!!!!!!!!!!

يانهاركو اسود ومهبب

هو الفن عندكوا بقى بيتقاس كده

ليه هو انتم بتشتغلوا ايه بالظبط ؟

طبعا غيرت القناه 

لقيت مذيعه مستفزه بتسأل اتنين شكلهم غريب تنطبق عليهم نظريه لومبروزوا http://ar.wikipedia.org/wiki/تشيزري_لومبروزو

وقاعده تهيص وتهلل ومطرب cnn

ماعلينا 

الاتنين قعدو يجعروا مع بعض بشكل منفر 

والله حرام فعلا الناس دى عليناكده

غيرت القناه تانى لقيت حد بيقول عووووووووو  

عو ايه بس؟ حرام عليكم مش كفايه علينا الدنيا والزمن الصعب هى  الحكايه ناقصه

 واضح جدا ان الكل ماشى بمبدأ   معاك تدفع يبقى اكيد تنفع 

واحنا نضيع معاهم  وطبعا مع وجود منتجين تجار ومعلمين 

اكيد مفيش حد هيدور على مستوى اللى بيقدمه من فن ومش هتفرق اذا كان فن هابط اوغيره

........وكفايه ان واحد منهم لاننكر دوره التاريخى القوى فى نشر الانحلال والذوق الهابط طلع بنفسه فى واحد من اعلانات القناه بتاعته 

يقول فن مين احنا بنعمل فلوس 

بصراحه عجبتنى صراحته مع نفسه 

وكمان بقى يلعب على المكشوف 

  اظن ان النماذج دى هى تعبير حقيقى عن الحاله اللى احنا وصلنا لها

فقد للهويه وتدنى فكرى  وربنا يستر

8 التعليقات

مرسلة بواسطة دودو في الاثنين, مايو 10, 2010