This awesome blogger theme comes under a Creative Commons license. They are free of charge to use as a theme for your blog and you can make changes to the templates to suit your needs.
RSS

عاوز حقى




عاوز حقى .....اتصور ان دى الكلمه اللى ممدوح الشاب الريفى الوسيم بيبص علينا من فوق ويقولها لنا دلوقتى

وعلشان تعرفوا هو مين لازم احكى لكم حكايته


هو اخو جد اولادى
شاب لم يتجاوز العشرين........ذهب ليحارب فى 67

بس مارجعش
ظل اخو الاكبر ينتظر عودته لسنوات
وزى ماحكى لى .........ان فرحته بانتصارنا فى حرب اكتوبر كان لها طعم مختلف
لان فيه امل ان ممدوح يرجع

بس مارجعش

ولم يمل من الانتظارحتى اواخر السبعينات وبعد الاتفاقيات والذى منه ....كان كل امله انه يوصل لرفات اخوه الاصغر


لمجرد انه يعرف مكانه ويقدر يقرى له الفاتحه

وفى التمنينات فوض امره لله

وعلشان كده باحمد الله انه فارق عالمنا
قبل مايسمع عن فيلم روح شاكيد او يقرى تحقيق الدستور عن ماجرى للاسرى فى سيناء

احمد الله انه ظل طول عمره معتقد انه اخوه الاصغر استشهد وهو بيحارب ولم يسمع عن الحكايات المأساويه عن قتل الاسرى بالدبابات بشكل مهين ووحشى

بس ياترى فيه اى حد هيجيب للناس دى حقها!!!!!!!!!؟؟


مااظنش
لما يبقى الاحياء يقدروا ياخدوا حقهم .......يبقى بعد كده نقدر ندور على حق اللى ماتوا

18 التعليقات:

يا مراكبي يقول...

ألف مبروك المدونة الجديدة وان شاء الله بالتوفيق

الموضوع للأسف مؤلم وبيمس كرامتنا بشكل كبير .. ومعرفتنا بالحقيقة هو اللي مزود الألم

أما الراحل اللي رحل من قبل ما يعرف الحقيقة فهو أحسن حالا مننا جميعا لأنه عبى الأقل معتقد شيء أكثر شرفا ومدعاه لرفع الرأس

انتي جاوبتي على نفسك في آخر البوست .. آخر جملة هي الحقيقة وهي الخلاصة

hamy يقول...

انا عمرى ما سكت عن حقى ولازم اخده فى الاخر فعلا بيكون ضغطى بقى عالى والسكر شرحه واحتمال ممكن توصل لجلطه فى القلب وسكته فى الدماغ لكن فى الاخر باخد حقى هو لازم نتبع سياسة النفس الطويل لحد مايطلع لكن لا يضيع حق وراءه مطالب

دودو يقول...

اهلا وسهلا بالمراكبى
سعيده بتعليقك جدا جدا

ولنا الله
قادر ياخد حقنا وحق اللى راحو

دودو يقول...

بعد الشر عليكى ياهامى

بس لو الحكايه فى ايدنا احنا
اكيد كلنا كنا هناخد نفس موقفك
بس للاسف
ال80 مليون مجرد ضيوف شرف
لابيقدروا يصدوا ولا يردوا
وكرامتنا وحق اللى اتهرسوا بالدبابات
فى ايد ناس ولا يفرق معاهم الموضوع فى اى حاجه
وعندى دليل فى منتهى البساطه
فى نفس يوم نشر التحقيق عن الاسرى وعرض رفاتهم المتروكه فى الصحرا

كان مستر نتنياهو مشرف على ارض سينا ومرحب به فيها
!!!!!!!!!!

سبهللة يقول...

دودو أسرى ايه اللى بتتكلمى عليهم
للأسف احنا اسرانا دمهم رخيص

اذا كان الاحياء دمهم أرخص من المية

هانفكر فى الاموات؟؟
مش لما نلاقى حل لمصايب الاحياء الميتين بالحيا وهم عايشين

مش لما نعرف نعالج المرضى اللى واقفين على ابواب الموت طوابير
نبقى نتكلم عن الاسرى

احنا هانلاحق اسرائيل قضائيا عن الاسرى

ولا هانلاحق المسئولين قضائيا عن المرضى والفقراء والاكل المروى بالمجارى و والمحاصيل المسرطنة

هاندافع عن رفات اسرى 76
ولا عن رفات الأسرى الاحياء

رمال سينا مروية بدماء شهداءنا فى حروب التحرير

وأسفلت مصر كله مروى بدماءنا
فى حروب الخبز والبنزين والسولار والتعليم
والسرطان والصرف الصحى والتلوث

وعلى رأى نوارة حبيبتى
البلد اللى حليتنا بااااااااااااااظت

همسات دافئه يقول...

دودو الجميله الف مبروك المدونه الجديده يا احلي مدونه
بجد رائع
هقول ايه حسبي الله ونعم الوكيل

الميكروباص يقول...
أزال المؤلف هذا التعليق.
الميكروباص يقول...

كان عدوان
وأي عدوان من المنطقي ان يكون رد فعل المعتدي علينا بهذا الشكل
فلن يدخل إلى أرضنا لكي يرحب بنا ويعطينا الورود
بل دخل كمحتل وسارق للأرض كما يفعل الآن في فلسطين
لا أريد أن أقول كلام يائس
ولكن لن تنفع أي شكوى الآن تجاههم
حتى بريطانيا لم تستطيع الووف أمامهم في عمليه اغتيال المبحوح وتزوير جوازات سفر بريطانيه
هل ينفع انك تذهب وتشتكي عدو؟
اكيد مستحيل
بالامس نزل موضوع مشابه عند بعض الناس ولم اعلق عليه لأن كلامي لم يكن يعجب الناس وكنت سأسمع مالا يرضيني
وراحوا يقارنوا بين لبنان والشاب المصري القتيل عندما طالبنا بالاعتذار والجزائر وما حدث عندما طالبنا بالاعتذار وقالوا لماذا تقوم الدنيا في حالة قيام عربي بالاعتداء على مصري ولا يحدث نفس الشيء مع اليهود
الأمر ليس حبا في اليهود كما يعتقد الناس
ولكن اليهود اعداء وأمرهم معروف
اما العربي فهو أخيك- فلا ينفع ان تصدر منه مثل هذه التصرفات
وإن أدمن هذه التصرفات صار عدوا- ولكن هذا مستحيل لأنه اخ في الدين واللغه عكس اليهودي

دي وجهة نظري بدون أي زعل
عدوك لن يعطيك أي حق لأنه عدوك ويتمنى فنائك من الدنيا
ومن يعطيك اي تعويض عن أي شيء او ضرر يحدث لك يكون بينك وبينه موده
ودول شوية نصابين بيسرقوا الاراضي وبيسرقوا فلوس المانيا والنمسا بالكذب إلى يومنا هذا
وهو ليس صديقي لكي اطلب منه تعويض
ولا يوجد بيني وبينه موده لكي اطلب منه تعويض
بل هو عدوي فقط وأنا كنت أنتظر منه هذا واكثر
وعلينا التعامل معه على هذا الاساس
فلا داعي من الاستغراب لأننا نتوقع منه هذا مستقبلا
ولهذا تاركين سيناء خربه إلى الآن لأنها أرض المواجهه المستقبليه

رحم الله الشهداء وعوضنا عنهم خيرا


تحياتي

Bella يقول...

وجعتي قلبي يادودو

تعرفي لما باشوف على قناة المنار احتفال اللبنانيين بشهدائهم باحس بغصة في حلقي وباحس اننا حتى شهداءنا لم نحتفل بهم ولم نذكر بهم الاجيال الحالية وبمرور الوقت اصبح الانتماء اضعف.

ده طبعا بخلاف وجود الصهاينة على ارضنا كسياح او كملاك لعدد كبير من مشاريعنا ومصانعنا.

لو كان جد أولادك عايش وشاف الهوان اللى احنا فيه كان مات من القهر.

الله يرحمه نجيب سرور فقد قال

الحق الحق أقول لكم: لا حق لحيٍّ إن ضاعت.. في الأرض حقوق الأموات. لا حق لميت إن يهتك عرض الكلمات!

دودو يقول...

سبهلله
ياحبيبتى ماانا عارفه انها بااااااااظت
ومن زمان

ومش مستنيه حد يجيب حق الناس دى

وزى ماقلت فى اخر التدوينه
لما اللى عايشين يعرفوا ياخدوا حقهم
نبقى ندور على حق اللى ماتو

دودو يقول...

لورانس
اهلا بيك
كلامك مظبوط وانا متفقه معاه تماما
وكنت بافكر وانا باكتب التدوينه دى
فى عقد مقارنه بين ماحدث مع جنودنا من سحل وتمثيل بهم من جانب الصهاينه
وبين ماحدث مع الشاب المصرى فى لبنان
وبين التهاون فى حق الجنود
والتهاون اللى هيحصل فى حق الشاب الممثل بجثته
بس ردود الافعال
التى بررت لقتله بالطريقه البشعه دى
افقدتنى الرغبه فى الكتابه عن الموضوع باكمله

دودو يقول...

هيرا
ربنا مايحرمنى من زوقك يارافعه معنوياتى

دودو يقول...

يلا
ده الفرق اللى بين سياستناتجاه مايخصنا والسياسات المتبعه من حزب الله وغيره وغيره تجاه شهداءهم

تخيلى لو اللى حصل ده كان ضد جنود اسرائليين وكان موثق بالشكل ده وباعتراف الجنود اللى ارتكبوا الجرم بنفسهم
والله .....دول كانوا ابتزوا الكره الارضيه بحالها
مش عارفه ايه الخيبه دى
يعنى بسلامتهم قاعدين يشاركوهم ويستقبلوهم مش عارفين يتعلموا منهم حاجه كويسه ابدا
:((

Alexandrian far away يقول...

الارض ما بتشربش الدم يا دودو
بيفضل على وشها لما ينتقم له

Alexandrian far away يقول...

مبروك علينا مدونتك :-)

دودو يقول...

الارض مابتشربش الدم ياياسر
وهتاخد حق اللى ماتو ا
طيب واحنا
مين هياخد حقنا !!!!!!!؟

نورت ياصديقى العزيز

Alexandrian far away يقول...

يعني ايه مين حياخد حقنا؟
أحنا حناخد حقنا طبعا
سؤال عجيب قوي الصراحه

دودو يقول...

ياسر
والله انت اللى بتدينى امل فى الحياه
:)))