This awesome blogger theme comes under a Creative Commons license. They are free of charge to use as a theme for your blog and you can make changes to the templates to suit your needs.
RSS

زومبى




لمروره بضائقة مالية..

انتحار شاب من فوق عمارة سكنية بالشيخ زايد


مصري ينتحر "شنقاً" على أشهر كباري القاهرة لعجزه عن الزواج

صعيدى يقطع "عضوه الذكرى" فى الشارع لتأخر زواجه
دى عناوين الجرايد اليومين دول 


حاجه غريبه جدا ....ايه اللى بيحصل !!!!!!!؟

الناس ليه بقت عندها يأس شديد للدرجه دى !!!؟

ليه الدنيا بقت سوده قوى فى عنيهم للدرجه دى !!؟

يمكن علشان حاسين انه مفيش فايده ؟

طيب ليه شاب عنده 31 سنه ومش عارف يعمل حاجه فى حياته !؟

وليه واحد عنده 30 سنه ومش قادر يلاقى شغل !!؟

وليه واحد تانى عنده 40 سنه ومش عارف يتجوز!!!!؟


بلد غريبه جدا 

ايوه غريبه 

لان فيها ناس كده ........مع ان فيها ناس تانيه بتقدر تدفع مهر 25 مليون جنيه .....علشان يتجوزوا فاتنه البرلمان ويقعدوها فى البيت .......طبعا غير الشبكه وخلافه 


وناس تانيه ..........بتدفع مبلغ تضاربت حوله الروايات مابين 20 الى 100مليون دولار  لاهل اشهر قتيله فيكى يامنطقه !!!!!!!!!!!!


ده غير الارقام الفلكيه اللى بنسمعها 

كابتن شوشو الجاهل سىء الخلق ثقيل الظل  بياخد 12 مليون

الفنانين اللى بيتحفونا بالتحف الخالده كل موسم كل واحد فيهم بياخد 10 مليون فى الفيلم

وغيره وغيره 

مش باقولكم بلد عجيبه 
 
ياترى الحاجات دى وغيرها هى اللى خلت شباب زى دول يكفروا بكل شىء

حياه صعبه وظروف اصعب .........وللاسف مفيش حد فينا بقى يحس بالتانى 

يعنى وانا باقرا خبر الشاب اللى انتحر من على كوبرى قصر النيل 

وشفت شكل الحبل وازاى مربوط 

يعنى اكيد اخد وقت 
مالفتش نظر اى حد من اللى ماشيين!!!!؟

ايه اللى جرالنا !!!!!؟

طيب الكارثه الكبيره من تداعى كل شىء حوالينا ..........وانتشار البطاله والفقر وغيره 
وعارفين ايه السبب فيها

طيب احنا !!!!!!!!!

ايه اللى جرى لنا !!!!!؟

ليه بقينا مجموعات من الموتى الاحياء ..........ماشيين مش حاسين باى حاجه بتحصل ..........ولا شايفين بعض..........ولا حاسين ببعض ؟


10 التعليقات:

noha gamal يقول...

عندك حق يادودو والله انا لماعرفت حكاية الشاب بتاع الكوبري اتصدمت بس مهما كانت الظروف مفيش مبرر للانتحار لافقر ولاياس ولا اى شئ دا كفر وعصيان للمولى عز وجل وظاهرة الانتحار مش دليل على سوء احوال البلد قد مايدل على البعد عن الدين والفضيلة واكبر دليل ان اكبر نسب انتحار فى العالم موجودة فى الدول الاسكندنافية والناس دى اغلى دخل واهم تعليم وتامين صحى فى العالم
الانتحار مش حل والانتحار عشان معرفش يجوز منى هبل وغباء وعته ولو كان استنى واتجوزها غالبا كان هينتحر برضة

دودو يقول...

هههههه
ده اكيد يانهى
ضحكتينى والله

تعرفى كل حاجه بقت متشابكه ومتلعبكه بطريقه
خلت الشباب ماباقوش عارفين الصح من الغلط

مش بيقدروا يحققوا طموحاتهم وفى نفس الوقت معندهومش قدره على الاحتمال

مع غياب الدين وانتشار الفساد فى كل شىء وفى كل مكان

ربنا يكون فى عونهم

فاتيما يقول...

دودو


ازيك يا فندم

سبحان الله

انا لسه كاتبة بوست عن حكاية عمرو دى النهاردة

ابقى اقريها و قوليلى رأيك برضو

ربنا مع الجميع و يرحمهم

تحياتى ليكى يا حبيبتى

دودو يقول...

فاتيما
منوره دايما ياحبيبتى

هاقراه حالا

أحــوال الهـوي يقول...

ليه كل اسالتك بلا اجابه
هل لانها حالات فرديه و ليست ظاهرة
طيب ليه ماتكلمتيش عن الملايين اللي دخلهم 300 جنيه في الشهر اسر كامله و عايشين ازاي ؟

و ناس ممكن في عشوة يدفعوهم

صحيح فيه كتير من المفارقات و لكنها ليست مبرر للانتحار
تعرفي كنت باسال نفسي دايما سؤال ليه بعض الناس بتلجأ للمخدرات و تبقي بعيد عن طبيعتها مسطولة او سكرانه ايه الميزة؟؟؟؟

و مش لاقي اجابه

تحياتي

دودو يقول...

استاذ عصام
اولا اهلا بيك

الاسئله لها اجابات واجابات محدده وواضحه
والاجابه حضرتك هتلاقيها فى سؤالى التالى
ليه بلد مليان خيرات اغلب اهله عايشين على 300جنيه ..بالرغم ان فيه ناس بتصرف فى عزومه عشا 40 الف جنيه ؟مش 300ودى حصلت قدامى

وبالرغم من كده انا لااعتبر كل الظروف الصعبه مبرر للانتحار ابدا ابدا
بس للاسف الناس كلها جرى لهم حاجه خلتهم اضعف من انهم يقاوموا كل الاسباب اللى وصلتهم للحال ده واضعف من انهم يقاوموا الظروف الصعبه ؟
وعلشان كده هانت عليهم حياتهم

نورتنى

غير معرف يقول...

فقدان الامل فى التغيير تغيير كل شىء دفع الناس لفقدان الايمان برحمة ربنا،ده بخلاف حالة اللامبالاة اللى ثبتت صحابنا اياهم بقواعد خرسانية فى اماكنهم
انا مش عارف ايه الحل
كرمنتس

دودو يقول...

تحليل منطقى جدا ياخليل

هوصحيح حرام
بس ايه المطلوب من راجل عنده 30 او 40 سنه
وماقدرش يعمل اى حاجه فى حياته
ومفيش امل كملن انه يقدر يعمل
ومحدش يقولى يشتغل بجد ويكافح والكلام اللى بقى مش جايب همه ده
لان فيه ناس بتكافح وبتشتغل 12 ساعه فى اليوم
ومش قادرين يطلعوا ربع خطوه لقدام
وبقالهم سنين طويله محلك سر
زى ماقال اخو الولد اللى انتحر ده
البلد دى بلد اللى مولودين وفى بقهم معلقه دهب
غير كده
اللى مش عاجبه يروح يموت

Me7'o يقول...

هو البوست ده حزين ولا يحتمل الهزار بس للأسف أنا أول ما قريته ماجاش فى بالى غير كلمة عادل إمام فى فيلم احترس من الخط

"واحد اتنين

بعد اتنين إيه يا ردالة

سبعة

واحد اتنين سبعة"

أهو احنا فى مصر كده بالظبط

واحد اتنين سبعة

يعنى تلاتة وأربعة وخمسة مش موجودين أساساً
الناس فى مصر نوعين

يا إما قريبين من الصفر

يا إما قريبين من العشرة

تحياتى

العلم نور يقول...

جزاك الله خير الجزاء..


(حملة الجسد الواحد)

أرجوا من المدونين الموقرين أن يضعوا شعار الحملة في الشريط الجانبي لمدوناتهم تضامنا مع أمة محمد !!

صورة الشعار .. في مدونتي كركر .. ويكتبون فوقها ..

(حملة الجـسد الواحـد)

رابط المدونة

http://krkr111.blogspot.com

جعله الله في ميزان حسانتكم .. آمين