This awesome blogger theme comes under a Creative Commons license. They are free of charge to use as a theme for your blog and you can make changes to the templates to suit your needs.
RSS

موعود ياللى عليك الدور


هل سألنا نفسنا ولو للحظة مَنْ هو الشهيد الجاى؟ ومَنْ هيكون الضحية الجاية؟


لان اكيد هيكون فيه ضحية قادمة...


لكن ياترى سألنا نفسنا مَينْ هو؟


ممكن تتخيل ولو للحظة أن الضحية اللى عليها الدور ممكن يكون أقرب الأقربين إليك؟


ممكن يكون .. .. أبوك .. ابنك .. جارك .. زميلك ..صاحبك.. أو أنت نفسك
ايوه...
ممكن تكون أنت نفسك الضحية الجايه



ولان مفيش حاجه تضمن ان محدش فينا يحصل له زى اللى حصل لخالد


 أو تخلينا نحس ان احنا بعيد وفى في مأمن منه مهما كانت الاحتياطات ومهما كنا حذرين.

سلبيتنا وسكوتنا ومبدأنا المفضل اللى مخلينا نمشى تحت الحيط مش جنبه مش هيحمينا



من أننا  ممكن يكون حدفينا هو الضحية القادمة.


ياترى هنفضل نطالب بحق خالد وهنفضل بنفس الحماس 


ولا كالعاده هنتحمس ونثور شويه وبعد كده كأن شيئا لم يكن


ونبتدى نتحمس لقضيه جديده وننساها بعد شويه .....وهكذا


اتمنى ان اللى حصل لخالد يبقى بدايه لحاجه تتغير 
علشان ابنى 
وابنك وكل ولادنا اللى ممكن يحصل لهم زى ماحصل لخالد





ياترى هنسكت وننسى زى تعودنا دائمًا؟

9 التعليقات:

الميكروباص يقول...

على فكره
فيه شهداء تانيين وناس بتتهان كتير
لكن محدش عارف عنهم حاجه

دودو يقول...

انا عارفه يالورانس
وللاسف
هما اكتر من اننا نعدهم
فاكر الولد اللى كان فى اسكندريه برضه
اللى الباشا معجبهوش انه بيجرى على البحر مع الكلب بتاعه
وضربه بالنار فى راسه
والدنيا اتشالت واتحطت
ولا حصل اى حاجه
فاكر الطفل الصغير بتاع شها
اللى اتزنقوا فى متهم يشيلوه قضيه
وقعدوا يعذبوا فى الولد ولما قرب يموت رموه قدام المستشفى
افكرك بايه ولا ايه ولا ايه ؟

بس يارب تكون المره دى هى اللى تفرق
اصل لو نسينا كالعاده
يبقى مانلومش الانفسنا

noha gamal يقول...

المرة دى مش هننسا احنا كنا بنتنسا كل مرة نحط اعزار نضحك على نفسنا مرة اصل دول اخوان او ايه نزلهم المظاهرة ولا محدش عارف العيال دى مين بيحركها وليه ...انما المرة دى حاجة تانية شاب طيب ومسالم وزى مبيقولو سماهم على وجههم شبه اخواتنا وولادنا اتحرق عليه قلبنا كلنا ومش كفايه انهم موتوه لا لازم نمرمغ بسمعته الارض ونتهمه بكل التهم اللى تيجى فى بالنا استفزونا بكدبهم وجرمهم البشع

فاتيما يقول...

لأ و النبىىىىىى متكسرى مقدايف تفاؤلى يا دودو الله يكرمك


انا ما صدقت ان المرة دى
الدنيا قايمة و مبتقعدش

معاكى ان كل مرة بترسى على مفيش
بس معرفش ليه حاسة ان الرياح الآن مواتية للتغيير
مش سياسياً بس
فيه جو عام مختلف
فيه تضامن معنوى غير عادى
فيه ناس جابت آخرها على كل المستويات
و فيه كمان حالة غباء رهيب من الجانب الآخر فى ادراة دفة المواجهات و دى جديدة او متعرفيش من تهالك الحال و لا عشان خلاص كدا جابت آخرها و لا إيه


سؤالك دا
اول سؤال سألته لروحى لما قريت قصة خالد و شفت صورته
اخويا الصغير شبهه ف الشكل و الهوايات
اول حاجة جت على بالى ...ان ممكن اخويا او ابنى يوسف لما يكبر و يبقى شاب قده
يخرجوا و يرجعولى جثة هامدة كدا ؟؟؟
انا مرعوبة عليهم
و على كل العيال

مبقاش عمرو اللى انتحر بنفسه
بقى كمان خالد
و الدور على مين
الدور على مين ؟!!


ربنا اسمه العدل


دى صورة ابنك ؟؟
ما شاء الله زى القمر
فكرنى بيوسف
ربنا يحرسهولك يا رب
هوه و كل عيال الناس التانية

دودو يقول...

يارب ماننسى يانهى
:(
اصل احنا نسايين اوى

دودو يقول...

فاتيما
يارب احساسك واحساسى يطلع مظبوط المره دى

ولو انى كل مااحس انها عتفرج .........
كل حاجه ترجع زى ماكانت

:(
ربنا يحمى اولادنا ويصبر اهله يارب
اللى كل يوم بيتعذبوا بسبب فراق ابنهم وتشويه سيرته كمان
_________

ايوه ده ابنى ياتيما
ربنا يحميلك يوسف ويطمنك عليه يارب

Unknown يقول...

الموضوع حيهمد و ينام و يتطرمخ عليه زيه زي الموضوع اللى قبله و الله قبله و اللى قبل اللى قبله

حد يفكرنى كدا بالناس اللى اعتصمت عشان حد ادنى للاجور .. ايه اللى حصل بعد كدا ؟؟؟
حد يفكرنى برضه بالمظاهرات عشان الجدار الفولاذي و الوقفات و التمطعات

بحححححححح خلاص ولا ايه !!!؟

حد يفكرنى كدا بالناس اللى اعتصمت امام مجلس الشعب
عمال امينستو
عمال التلفونات
عمال المعصرة

فيييييييييين ؟؟
طيب الناس اللى عدت اللآلاف تضامنا على الفيس بوك مع خالد ؟

و اللى وصلوا لآلاف اخري عند عم الحاج البرادعي ؟
فين دول ؟

فين من الوقفه ؟؟
نسبتهم كام منهم طلع المظاهرة ؟

احنا دلوقت عمالين نتكلم و نقول وقفه فلانية .. مظاهرة علانية
و كل واحد يطلع .. خلاص يقول انا عملت اللى عليا و طلعت هيصت شويه و فضيت الطاقة فى شتيمة و زعيق
و فسسسسسسسسسسسسسسسسس ..خلاص على كدا شكرا

ما هو الراجل كدا ليه حق يطفش و يهرب مننا
حيطلع لوحده يعنى يقول انا عاوز اغير
اخرته عصايه على دماغه او ازمة قلبيه زى ايمن نور و شكرا على كدا
و ابقى تعالى قابلنى لو حد وقف معاك

و هم مش عبط ولا هبل عارفين ان كل اللى بييجى دا على مفيش
جعجعه بلا طحن
بس احنا نبعت شويه عساكر عشان يحوطوهم لزوم التأمين و خلاص

الناس دى فاهمه كويس هى بتعمل ايه ؟

عمرك شفتى جزار بيخاف من عدد الخرفان اللى حيدبحها ؟؟
كل خروف فيهم واقف مستنى دوره و مش قادر يحرك ليته حتي

للأسف للأسف للأسف مفيش فايدة
ملهاش حل غير هى نار تنزل تحرق و تجيب على الارض

و نشتغل على نظيف من الاول

تقبلى مروري

Unknown يقول...

ايام زمان فى عصر طوفان التتار

كان التتري يطلع يتمشي كدا من غير سلاحه
يقابل عرب يفوقوه عده و عتاد

كان يثبتهم .. خليكوا واقفين مكانكم .. حروح اجيب السيف و جاى تانى اوعوا حد يتحرك من مكانه و كانوا بيسمعوا الكلام
و يقتلهم

احنا اتمارست علينا اقذر مؤامرة فى التاريخ مدتها على اقل تقدير ان مكانش اكتر 50 سنة لمسخ و محو ارادة الشعب المصري
و في آخر 30 سنة الموضوع مش محتاج شرح كل حاجه باينه زى الشمس

فى حاله من الجبن و السلبية و البلاده محصلتش ولا حتحصل
و فى ناس نفسها و الله تبقى كدا و تتمنى تبقى من الجلادين و تتمنى ان الوضع يفضل زى ما هو عليه
و مش نسبه قليلة .. لا نسبه كبيرة جدا اكتر مما نتخيل

الحل اللى انا شايفه ان الجهاد الالكترونى دا ملهوش اى تأثير الا على شريحه بسيطة جدا

و فى نظري لن يصلح الا البدأ من القواعد .. اصلاح المجتمع نفسه و التواصل مع كل فئاته و توعيتهم دينيا و ثقافيا لبناء قاعده عريضة للنهوض بجيل جديد تخلص من عوامل و جينات الانحدار و الانحلال الاخلاقي و القيمى

و بالنسبة لكلاب الداخلية
و زبانية لازوغلي
مش حينفع معاكم غير التكفيريين عشان يمرمغوا انوفكم فى التراب
و يخلوكم تمشوا تبصوا وراكم
و ابشروا انتوا ابتديتوا تدفعوا الناس لكدا
و بكرة نصحى الصبح على خبر قنص كلب فيكم
او تفجير فى قسم شرطة او تفخيخ عربية أمن

حتشوفوا

دودو يقول...

بلوووووووووو

يامرحب بيك
:))
انت جبت من الاخر
وقولت خلاصه الخلاصه


ملهاش حل غير هى نار تنزل تحرق و تجيب على الارض

و نشتغل على نظيف من الاول


ده رايى من زمااااان

لانى زيك بالظبط شايفه ان مفيش قايده

وانا متفقه معاك نماما فى كل الاشياء
من تحويلنا لمسوخ مشوهه على مدى 50 عام

الى عدم جدوى النضال الالكترونى


ولكنى لااتمنى ان نتحول الى الفوضى والقتل من اجل الحصول على حقوقنا او الانتقام من من سلبوها منا

وعلشان كده اسمح لى اقولك
مفيش فايده


اهلا بيك