This awesome blogger theme comes under a Creative Commons license. They are free of charge to use as a theme for your blog and you can make changes to the templates to suit your needs.
RSS

صناعة الغباء


صناعة الغباء 


الغباء له اهله وناسه وهو عدوى والشفاء منه حاجه صعبه جدا 

القصه الافتراضيه دى كان بيتم الاستعانه بها فى محاضرات التنميه الاداريه 

بتقول ايه بقى......

انه كان فيه 10 اطفال بيلعبوا جنب شريط القطر
اختار 9 منهم ان يلعبوا جنب الخط اللى القطر بيعدى عليه بانتظام 
والطفل العاشر اختار انه يلعب جنب الخط المهجور اللى مفيش قطر بيعدى عليه 

وفجأه .....لمح عامل المزلقان القطر .....وفاترعب على الاطفال التسعه اللى بيلعبوا على شريط القطر .....ياترى احنا لو مكانه هنتصرف ازاى !!!!؟
مش مشكله دلوقتى 
المهم الرجل فى القصه الافتراضيه اتصرف ازاى 

فكر بسرعه وقرر انه يحول القطر من الخط الاصلى للخط المهجور .....وكده ضحى بطفل فى سبيل انقاذ تسعه اطفال ........حلو الكلام !!!!؟

لاول وهله ....يبدولنا ان عامل المزلقان اتصرف صح ...بمنطق الكم لانه انقذ تسعه 

يعنى قراره انقذ الموقف باقل الخسائر 

لكن لو فكرنا بعمق ومنطق لاكتشفنا انه مخطىء تماما 

لييييييه ؟

لان الطفل الواحد اللى ضحى به عامل المزلقان كان اذكى الاطفال العشره 

لانه هو الوحيد اللى فكر صح واختار انه يلعب فى المكان الامن 

اما التسعه الاخرون اللى تم انقاذ حياتهم هما الاغبياء المستهترون لانهم مافكروش واختاروا اللعب فى مكان خطر ......
.طبعا معالجه الموضوع بهذه النظره يبدو قاسى جدا وغير عاطفى .....بس هو ده الفرق بين المجتمعات الذكيه والغبيه
 فى المجتمعات الغبيه دايما يتم التضحيه بالاذكياء وذوى الكفاءه ...


.اما المجتمعات الذكيه فداائما الاذكياءوالعقلاء هم اللى بيقودوا والدول التى تبحث عن التقدم دايما تبحث عن المميزين والاذكياء..


وتضعهم فى اول الصف لان عقولهم وذكائهم قادرين على دفع مجتمعاتهم بما فيها الاغبياء الى الامام 



اما الدول بعد الشر عنا وعنكم الغبيه ,فتحترف قتل المواهب ودفن الافكار والعقول
وتضع الاغبياء فى اول الصف ...فيجذبون الكل الى الهاويه ....وفى الغالب بيجدوا ناس اغبى منهم تصقف لهم 

فى الدول المتقدمه يتم احتواء العقول والانفاق عليها ....لان من الممكن جدا ان عقليه واحده تتمتع بالذكاء ورجاحه العقل تقدر تحل مشكله مزمنه كانت تستعصى على الحل.....وطبعا دى مهمه صعبه جدا

اما بقى الدول اللى متتسماش .....الغبيه 
الاغبيا اكتر من الهم على القلب منتشرون مثل الوباء

وطبعا لايمكن لبنى ادم غبى انه يستعين باخر اذكى من حضرته لمساعدته ....طبعا بيختار حداغبى منه


 فى احيان كتيره جدا بيخلفه وعلشان كده بنجد ان الدول الذكيه المتقدمه بتزداد تقدما والتانيين بيزدادوا غبااااااااااوه 


فى الدول الذكيه يتم استثمار العقول لانها بتدعم الاستقرار ...بكل انواعه اجتماعى واقتصادى و......سياسى 


ودائما تفكر الدول الذكيه فى تطوير ماتمتلكه من عقول ودعم مهارات ومواهب المميزين


اما من يعتنقوا الغباءفدائما وابدا يسبحون فى بحور عميقه من الغش والكذب والتضليل 


وعلشان كده 
بنجد مسئولين فى الدول الذكيه بيعرفوا امتى يتركوا المسؤليه ....لييييه ؟


لانهم اذكياء ومدركين لطبيعه الزمن وحركته وحق الاجيال الذكيه التى تليهم ....


.ولانهم اذكىاء فانهم واثقون تماما ان فيه واحد من الاجيال دى اقدر واكفأ وافضل منهم ..




..ووقتها ممكن جدا يبقوا سعداء لانهم نجحوا فى اخراج اجيال قادره على تحقيق مالم يقدر وا هم على تحقيقه ......اه والله 
!!!!!!!!!!


نظيره بقى فى الدول اللى ماتتسماش ....بيقاتل من اجل الاستمرار فى منصبه ويمسك فيه بايديه وسنانه 


لييه ؟
لانه يشعر ان قيمته فى كرسيه مش فى شخصه ولا عقله 


ودائما يحارب من يحاول ان يصل لنفس مكانته ..
....لانه عاده ....بيكون وصل لها بطرق غير طبيعيه ....


ودائما يظن انه اذكى الاذكياء وانه عنده القدره على خداع الاخرين ...


..وطبعا اللى بيجى بعد بيبقى اغبى واسوء منه


وحال المرؤسين لايختلف عن حال رؤسائهم


ففى الدول الذكيه نجده طموح وواثق من نفسه ومن قدراته ودائما يعمل على تحسين قدراته ....لان ده مرتبط بزياده فرصه فى الترقى .....
.صاحبنا بتاع الدول الغبيه لايبذل اى مجهود .....دايما ريلاااااكس ومستكين لانه عارف ان وجوده فى مكانه وارتقائه فيه مرهون بطاعته لاوامر رئيسه ...
.فلا يطمح فى شىء الا فى البقاء فى مكانه .....او يطلع علينا بافكار لوذعيه من عينه التوقيت الشتوى فى عز الصيف

اعذروونى طولت عليكم اوى 

بس دى كانت تداعيات افكار جت على بالى بعد الخبر المضحك اللى قريته النهارده بخصوص عوده التوقيت الشتوى فى عز اغسطس ويرجع تانى صيفى بعد رمضان ولمده عشرين يوم ويرجع شتوى تااااااانى 
آآآآآآآآآآآه يادماااااغى..........................وكل سنه وانتم طيبين 






منقوووووووووول ....بتصرف

14 التعليقات:

الميكروباص يقول...

لقتل أصحاب الأفكار أسباب
منها حب الظهور
ومنها عدم ظهور أحد محترم من أجل عدم التفاف الناس حوله
ولذلك المواهب في بلدنا مقتوله
ولا يقتصر هذا الامر على الحكومه فقط- بل يفعله الدكاتره في المركز القومي للبحوث والجامعات
فيتنج من هذا صناعة الغباء حتى يعرف الناس كيف يعيشوا
فيظلوا اغبياء لنه لو أظهر احدهم أنه بيفهم ممكن يروح في داهيه ويجد من يحاربوه
فيبقى غبي ليأكل عيش
ومن هنا جاء السيستم اللي احنا ماشيين به
ولهذا فلا عجب من موضوع التوقيت
انا كنت فاكر انهم هايرجعوه على رمضان ونكمل به إلى ما بعد رمضان طول الشتاء - اما عودته بعد رمضان صيفي وبعده نقلب شتوي فهذا اسمه سطل

دودو يقول...

بالظبط يالورانس

كلامك صح جدا
وعلشان كده المقال ده عجبنى جدا جدا لما قريته فى المصرى اليوم
ولقيته مناسب جدا وفيه تفسير شامل
لحاله الهبل العام اللى احنا عايشين فيها .....

فاتيما يقول...

و انتى طيبة
و بالصحة و السلامة يا دودو
رمضان كريم عليكى و على الولاد و على كل احبابك يا رب


الكلام المكتوب ف التدوينة
خلى ميت حاجة
تيجى ف دماغى


اولهم
---
انى اشكرك على تعليقك
و سؤالك عنى و اللى انكتب
و اللى مكنتبش
بس قادرة نوعا ما
اتخيل قلبك فيه ايه
و احساسك كمان وصل بين السطور
فمنحرمشى منك
و لا من طبطباتك




ثانياً بقى

بخصوص حكاية الذكاء دى
سمعت مرة احمد مستجير الله يرحمه
بيتكلم عنها
و عن حكاية ان الجيانت و التلاعب فيها و استخدام حكاية الهندسة الوراثية و كشفها عن معدلات الذكاء العالية عند بعض الناس
وبالتالى التركيز على الأذكياء فقط
لأنهم الأولى بالرعاية من صغرهم
و عدم الالتفات للأغبياء
او وقت التضحية يبقى محسوم الموضوع

حاجة كدا شبه النظرية المكتوبة بتاعة اول البوست

ساعتها احمد مستجير
قال رأى عجبنى قوى


قال ان العكس هو ما يجب
الاذكياء بيعرفوا ازاى يعتنوا بروحهم
بينما يفترض بالعلم
أن يساهم ف حل المشكلات
و مساعدة الاقل شأنا


و قال جملة
بعتبرها عبقرية


قال العلم مش جاف و قاسى
العلم الحقيقى
لازم يقترن بالرحمة


و بالتالى مش لازم يكون فيه تمييز
و لكن توزيع جهد فقط



ثالثاُ
معاكى ف حكاية التوقيت الشتوى دى
كدلالة على الغباء المطبق
بس الغباء هنا يا دودو
مقصود
يعنى متعمد
و عن سبق اصرار


لكن النظريات اللى حكيتى عنها
بتتكلم عن الوضع العادى الإنسانى البحت
مش الوضع الشيطانى
اللى ف بلاد لا نعرفها دى خالص


تعرفى انا بحس
ان مشكلتنا ف البلد دى
ان الأشرار عندنا شرهم صافى
لا تشوبه شائبة
آه بيور كدا و نقى و اصيل
زى ما الطيبة برضو عندنا
اصيلة و بهبل و بشكل رهيب


معندناش وسط خالص
و يمكن دا السبب ف صمود البلد دى
و استمرارها رغم كل البلاوى
على مر العصور



ان دايما الكفة بتتوزان


جنب الشر المطبق
فيه خير بلا حدود

جنب المغرضين
فيه المضحين

جنب الحرامية و قتالين القتلة
فيه المعطائين و الشهداء


انا رغيت معلش
بس البوست حلو قوى


خالص حبى ليكى يا حبيبتى

رحــــيـل يقول...

ايه ده هما هيعملوا فعلا كده فى الساعة يالهوى ايه الهبل فى الجبل ده؟
احنا وصل الحال بينا لكده
قمة الغبااااااااااء طبعا اللى بقينا بنعاني منه من سنين

ربنا يسترها علينا

دودو يقول...

فاتيما حبيبتى انتى ترغى براحتك خالص

انا معاكى تماما فى كل حاجه قولتيها

بس فى الاول والاخر اكيد دى نظريه تطبيقها صعب جدا
يمكن فى الدول المتقدمه بيعرفوا يطبقوها ......

اما حكايه التوقيت الشتوى فى عز الصيف
دى جنان رسمى

ازاى ..ده مش غباء وبس..وبما انى باموووت فى نظريه المؤامره
اه والله :))
جه فى بالى انهم قاصدين يعملوا كده
علشان يخلونا مسخره الشعوب وكمان يبوظوا لنا الساعه البيولوجيه
وطبعا احنا هنتجنن بعد كده وده عز الطلب .....مش مكفيهم ان احنا شايفين وساكتين لااااااااااااا....دول عاوزينا مجانيين كمان
يالهوووووى .....معلش بوادر الهسهس والجنان ظهرت

وده يثبت نظريتك ياطمطم ....اكيد الناس دى عندها الشر مطلق ....والا ايه تفسير كل الحاجات الغريبه والغير منطقيه ...اللى بنقرى عنها كل يوم دى؟

انا كنت باحسب ان ده غباء
وعلشان كده لما قريت المقال ده فى المصرى اليوم
عجبنى جدا جدا
ولقيت فيه تفسير لحاله الجنون اللى احنا بنعيشها
بس
نظريتك فى مسأله الشر المطلق ....اقوى
على الاقل الغبى احيانا بيطلع منه اشياء كويسه ....انما اننا دايما من اسوأ لاسوأ......فده اكيد اكيد شر وشر موجهه ومدروس
ربنا يرحمنا ياااااارب


ومايحرمنى ابدا من تعليقاتك ولا من طلتك عليا ياطمطومتى ياجميله

دودو يقول...

رحيل

والله اللى بيحصل ده مش لاقيه له اسم ولا تفسير
غباوه... هبل ...استهبال
مش عارفه
ماحنا كنا بنصوم طول الشهر اللى فات وفى عز الحر ....ماكانتش مشكله يعنى

ربنا يديهم على قد نيتهم بقى ....والله مابقيت فاهمه حاجه


واهلا بيكى

مهندسة كريمة يقول...
أزال المؤلف هذا التعليق.
مهندسة كريمة يقول...

موضوع فعلاً رائع و جدير بالإهتمام .

أعجبنى جداً تعليق فطومة .

مي ثابت يقول...

دودو الحبيبة :
---------

أنا حبتدى من إيمانك بنظرية المؤامرة .. و اللى أنا كمان موقنة بها تماماً .
بل و أعتبر مقولة "المستشار طارق البشرى" : أنه من المؤامرة ألا نؤمن بنظرية المؤامرة ... أعتبرها مقولة بليغة حكيمة .

و لعل أبرز مثال على المؤامرة التى تحاك لنا هو .. إستوزار:
شرطى سادى , فاقد أهلية , فاشل ,جاهل , مصاص دماء و نصاب أراضى ....
للتعليم , التعليم العالى , الإعلام , الثقافة , المالية و الإسكان .. على الترتيب .

إذاً :
يطولوا ساعات النهار يا دودو أو يقصروها .. يغيروا الساعة أو يثبتوها ... مش فارقة !!! بعد أن احالوا يومنا و عيشتنا إلى ليلٍ حالك السواد .

دودو يقول...

مى سماء الحريه

تعليق طمطم ينفع تدوينه لوحده اشاركك الاعجاب
واهلا بيكى

دودو يقول...

مى ...ميويه حبيبتى

انا فعلا مؤمنه بنظريه المؤامره
لانه لايمكن ان الكم المرعب من الاحداث اللى بتحصل لنا دى يكون محض صدفه ابدا
كتييييير
باحس انه سيستم ....منظومه متكامله للخراب والتخريب المتعمد
وعلى قولك يامى يطولوا يقصروا مابقيتش تفرق

دودو يقول...

نداااااااااااااااااء
ورجاااااااااااااء
مى ثابت

فاتيما

ياريت تيجوا على الفيس بوك

مي ثابت يقول...

الغالية دودو :
--------
إنتِ تؤمرى مش تترجى ... جاااااااارى التنفيذ .

عين فى الجنة يقول...

وانتى طيبة