This awesome blogger theme comes under a Creative Commons license. They are free of charge to use as a theme for your blog and you can make changes to the templates to suit your needs.
RSS

مغامره مفاجئه

..مع انى دايما كنت اسمع عن الاشياء الغريبه اللى بتحصل كل يوم وفى كل مكان حوالينا 


الا انى اول مره اشوف عينه من اللى بيحصل ده يوم الجمعه الماضى 


ابنى ارتفعت حرارته جداجدا والكمادات والادويه اللى الدكتور كتبها معملتش اى حاجه اتصلنا بالدكتور علشان يجى يشوفه بسرعه 




اعتذر لنا وقال انه مش هيقدر يجى دلوقتى لانه فى المستشفى 


...بس لو الحاله ماتحتملش ممكن تجيبوه المستشفى اشوفه


 ولو فيه حاجه تتعمل نعملها هناك


 طبعا اخدنا الولد وجرينا بيه على المستشفى لان حالته كانت لاتحتمل اى انتظار


 اول ماوصلنا بنسأل على الدكتور قالولنا ان فى حاله طارئه جت له وهيخلص ويجى


...ولان ابنى لونه ابتدى يتغير ووشه شحب بطريقه غريبه .


.جرينا ندور على على اى دكتور موجود يشوفه ...


وفعلا لقينا دكتوره منتقبه ....قولت كويس الحمدلله ....اخدناه لها بسرعه


 وبصت على الولد وفجأه لقينها بتقول اسفه مش هاقدر اكشف عليه !!!!!!!!!!!


ليه ياستى قالت مش باكشف على رجاله !!!!!!!!!!!


بس الولد عنده 15 سنه بس


ردت طيب وايه يعنى هو ماشالله طويل وبعدين 15 سنه ده راجل 


...المهم ان الدكتوره الفاضله فضلت تسأل هو ماله بيشتكى من ايه ..ايه اللى بيوجعه بالظبط ...


.وبناءا عن الكشف الشفوى اللى عملته كتبت روشته !!!!!!!!..اه والله 
طبعا الكلام ده معجبنيش ابداولا اقنعنى موضوع الكشف الشفوى ده  وخرجنا ندور على الدكتور اللى احنا رايحين له اصلا..


.المهم ان احنا لقيناه وبعد ماشاف الولد وكشف عليه كويس و طلع الموضوع مش بسيط ويستلزم اجراءات سريعه زى تعليق المحاليل وبسرعه


 قعد معانا واعتذر عن التأخبر وابتدا يشرح لنا ايه سبب تأخيره 


....السبب ان فيه اتنين بلطجيه !!!ايووووه بلطجيه بحق وحقيق

كانوا بيتخانقوا بسبب المنافسه على منطقه ما ...


مين صاحب النفوذ فيها ...بمعنى مين فيهم هياخد الاتاوات من اصحاب المحلات والباعه اللى فارشين بضائعهم فيها !!!!!!!


المهم الخناقه تطورت وواحد فيهم ضرب التانى بمطواه وقتله 
 قتله !!!!!!!!!!!!....وهو كان بيشوف الحاله 


انا يبقى معايا فى نفس المكان قتيل !!!!؟


ماعلينا واحنا منتظرين الاسعافات الازمه لابنى تكمل ..


.الا ونسمع صوت صراخ رهيب ...وطبعا المتطوعين باخبار كل الموجودين عن الحكايه...


.قالوا ان ده شخص كان مطلوب وان حصل بينه وبين الشرطه مطارده زى اللى بتحصل فى افلام الاكشن الرديئه ...


وانه اثناء المطارده وهو بينط  من بيت لبيت وقع من الدور الخامس 
!!!!!!!!!!!!!!




اشياء مش عارفه ليه كنت معتقده انها مش بتحصل الا فى الافلام العربى




 واتضح ان اصوات الصراخ الرهيب دى ناتجه عن انهم بيردوا له الخلع اللى حصل له فى جسمه 


اصله وقع من الدور الخامس ومامتش !!!!!!!!!!!


بعد ماخرجنا من المستشفى دى على خير ...


قعدت بهدوء افكر فى كل الحاجات اللى حصلت طول اليوم ...


ازاى طبيبه المفروض ان شغلتهااللى بتقبض مرتب عنها انها تساعد المرضى ترفض الكشف على اى مريض تحت اى سبب ؟




فرضا ان المريض ده بين الحياه والموت لاقدر الله وان رفضها الكشف عليه لانه راجل !!!...كان السبب فى موته ....




هل هى معتقده ان ربنا هيسامحها لانه فضلت متمسكه بانها ماتلمسش راجل !!!؟




ومادام هى متمسكه بانها ماتكشفش على رجال ليه بتشتغل فى مستشفى بيستقبل حالات من الجنسين ..


ماتروح تشتغل فى مستشفى حريمى 
!!!ياترى هى راضيه عن نفسها ومعتقده انها باللى بتعمله ده بترضى ربنا!!


.هل هى معتبره ان المرتب اللى بتاخده مال حلال !!!؟


المفروض ان الطب رساله نبيله مهمتها تخفبف الام المرضى وانقاذ ارواحهم بصرف النظر عن لونهم او جنسهم او دينهم ....


او يمكن الحكايه دى اتغيرت وانا مش واخده بالى 






اما حكايه البلطجيه اللى واحد فيهم قتل التانى ...


عرفت بالصدفه ان اثناء الخناقه الرهيبه اللى حصلت بينهم كان موجود ناس من جهات بايدها انهاء الموضوع


 ولم يتدخلوا نهائيا ....وعرفت ان المبدأ المعمول به فى الحالات دى ....سيبوهم يخلصوا على بعض....


!!!!!!!!
المغامره الغريبه طرحت العديد من الاسئله على ذهنى 


اهمها...هى البلد دى ماشيه كده كل واحد يعمل اللى هو عاوزه من غير رقيب ولا حسيب .؟


 وياترى دى بدايه الفوضى ولا احنا كده فى قمه الفوضى !!!؟

13 التعليقات:

Noha Saleh يقول...

اغرب حاجة موقف الدكتورة
مش عارفة ازاى كده
ازاى ممكن تسيب انسان مريض وممكن حالته تسوء اكتر علشان هو راجل
يعنى لو مفيش غيرها فى المستشفى يبقى ايه موقفها من المرضى
هى فعلا فوضى

bastokka طهقانة يقول...

الف سلامة على ابنك ربنا يشفيه و يعافيه يا جميلة
فعلا يوم غريب و احداث مرعبة
انت تسائلتي تساؤل خطير فعلا احنا بقينا في عصر الفوضى
ربنا يعدينا منه على خير
المشكلة في العصر اللي بعده
محبتي

غير معرف يقول...

أولا يا دودو
الهانم اللى عاملة فيها طبيبة دى لاتعلم من الطب ولا العلم ولا الدين أى شئ
من المعروف أن إحدى زوجات الصحابة كانت طبيبة وأذن لها النبى بالكشف على الرجال مع علمه بأن الكشف قد يعنى كشف جزء من الجسم أو أكثر .
أما مسألة البلطجية
فهى مسألة ناتجة عن غياب الأمن
وتحوله من الحفاظ على الأمن العام إلى الحفاظ على الأمن السياسى فقط
ومن أسبابه - بدون إستهزاء - تغيير شعار الشرطة
من " الشرطة فى خدمة الشعب " إلى " الشعب والشرطة فى خدمة الوطن " ...

حاتم محمد تحسين يقول...

أولا يا دودو
الهانم اللى عاملة فيها طبيبة دى لاتعلم من الطب ولا العلم ولا الدين أى شئ
من المعروف أن إحدى زوجات الصحابة كانت طبيبة وأذن لها النبى بالكشف على الرجال مع علمه بأن الكشف قد يعنى كشف جزء من الجسم أو أكثر .
أما مسألة البلطجية
فهى مسألة ناتجة عن غياب الأمن
وتحوله من الحفاظ على الأمن العام إلى الحفاظ على الأمن السياسى فقط
ومن أسبابه - بدون إستهزاء - تغيير شعار الشرطة
من " الشرطة فى خدمة الشعب " إلى " الشعب والشرطة فى خدمة

Mona Hekal يقول...

اولا حمدالله علي سلامة محمد
ثانيا شكرا انك نزلتي الموضوع
ثالثا اجابه سؤالك واضحة في كل حاجة حوالينا احنا خلاص في قمة الفوضي ومش عارفة اخرتها ايه ربنا يسترها علينا
تقبلي خالص احترامي

رحــــيـل يقول...

انا شايفه ان الدكتورة دى تخليها فى بيتها احسن
ايه الاستفزاز ده

الفقيرة إلى الله أم البنات يقول...

الف سلامه يا حبيبة قلبى على ابنك ويارب ميتشوفيش فيهم شئ وحش

انا بصراحه دلوقت بقول عندهم حق يمنعوا الطبيبات المنتقبات طالما بترفض الكشف على المريض وللاسف اللى عملته مش إنسانى خالص..وفى ناس مش موضوع النقاب تدين..ترييح دماغ لانه قبل ما انتقب مفروض ابقى عارفه ان النقاب يعنى لكل الناس أعلى درجه من كل شئ الالتزام والادب والاخلاق والحنيه والعطف

مش قادره اتخيل الست دى بتنام مرتاحه؟ ازاى وطفل عنده 15 سنه حرارته عاليه
حتى لو شاب ...روح انسان..طيب
نقول الضرورات تبيح المحظورات
رغم إنى احترم النقاب والمنتقبات جدا إلا قله منهم شوهوه وخلوا ناس كتير مش بتفهم تسب فيه

نيجى للبلطجه....ست الكل انت تعيش عصر المطوة والسنجه والسرقه بالاكراه

ربنا يخرجنا من هذه القرية الظالم اهلها

الف سلامه على محمد افندى ربنا يبعد عنه الشر

كلمات من نور يقول...

طيب أعلق أقول إيه يا دودو يختي؟

القول ضايع في مصر المخروسة

اوبس قصدي المحروسة يختي

بصي هي من ناحية وصلنا لقمة الفوضى فزوجي العزيز بيقولي لسه احنا في بدايتها (متشائل قوي ) بس الظاهر انه هو واقعي و أنا اللي متفائلة زياده


ربي يشفي محمد وحمدا لله على سلامته

اما هذه الطبيبة فكان أجدر بيها تتخصص نساء أو اطفال حديثي الولادة أو تتجوز وتقعد في البيت

تحياتي

ميرا ( وومن ) يقول...

ألف بعد الشر علي أبنك يا دودو

اللهم أشفة شفاء لا يغادر سقماً

----------
بالنسبة للقتيل بقي فده العادي والطبيعي والمتوقع

نظرية سيبوهم يخلصوا علي بعض معروفة ومن زمان والأمن في الخناقات دي بيوصل بعد ما يقع قتيل او يفضل مستني لما تولع أكتر

---------
الست الدكتورة دي أنا مش فاهماها !!!!
طب متخصصتش نساء وولاده ليه علشان تتعامل مع الستات بس
ولا اصلا فعلا بتنزل تشتغل ليه لما هي دي قناعتها

ربنا يرحمنا برحمته

فاتيما يقول...
أزال المؤلف هذا التعليق.
فاتيما يقول...

اولاااااا

الف حمدلله على سلامة
الولد الشقاوة
قصدى الراجل الشقاوة
ماهو بقى راجل
و عملنا مشاكل اهو
بسبب كدا


ثانياً
حمدلله على سلامتك انتى
وكنتى وحشانى
ووحشانا كلنا


ثالثاً
بتهرجى يا دودو ؟!!
انتى لسه بتسألى السؤال دا ؟!!
دى بديهيات خلاص
الدنيا فوضى
و كل واحد يعمل اللى يعمله
و لو مصيبة ..يستحسن جدا
الله يرحمه يوسف شاهين
هيا فوضى فعلا



رابعا
الأخت الدكاتورة
محيرانى فى غير موضوع الدين وحرام و ..الخ
حاجة تانية خالص

اصل اللى بيتعامل
مع الجسد البشرى ..او حتى الحيوان
بعد فترة بيفقد أى احساس بالدهشة
او الإنفعال او حتى الرغبة
يعنى بالنسبالها
ابنك مجرد حالة
وبتتعرض عليها
يعنى بلاش زى ابنها او اخوها
دا حالة زى أى حالة بتشوفها
متفرقش قوى راجل ولا ست
كبير ولا صغير
وبعدين اين القسم اللى بيقسموه ؟!!
بس هتقولى ايه
هيا
فوضى




المهم ان الولد الحمدلله
بخير
وانتى والبنوتة
وكلكم تمام
ربنا يطمنا عليكى دايما
ومتغبيش كدا علينا


بوسات وحضونات
و كل سنة وانتى طيبة يا حبيبتى

اميرة بهي الدين يقول...

للاسف مجتمعنا بقي مليان حاجات كنا بنفتكرها غريبه مابقتش غريبه ، بقت عادي ، لكن اكتر الاشياء استفزازا الطبيبه المنقبة !!! لن اعلق علي موقفها لاني حاضطر اسفه اخرج عن ادبي وهي الطبيبه التي لم تراعي ضميرها ولم تتقي الله في الطفل او الشاب الصغير المحتاج لرعايه طبيه حرمته منها بمخها المقفول ... المهم حمد الله علي سلامه الشاب الصغير واللي يعيش ياما يشوف واللي يروح المستشفي يشوف اكتر !!!

bastokka طهقانة يقول...

انزلي بالجديد يا دودو
وحشتينا